Raikitra ! Tsy ho diso anjara ireo mpankafy ny mozika rap any Antsirabe. Hoentin’i Mito an-tsehatra any Bira ny vokatra vaovao be amin’ny endrika kapila mangirana « Fianakams Hip Hop ». Seho hatao, ao amin’ny trano fisakafoana sy filanonana « La palette », ny Sabotsy 28 Aogositra ho avy izao.
Naneho ny heviny mikasika ny firafitry ny governemanta vaovao ny filohan’ny fikambanana AV7 atoa Andriamahanina Haja, fa afa-po tamin’ireo mpikambana vaovao notendren’ny filoha Rajoelina Andry ny fikambanana.
Nanao hetsika ary nitokona nanolona ny biraon’ny fokontany Manakambahiny, ny mponina tao an-toerana ny alatsinainy lasa teo. Nilanja sorabaventy no sady nisioka kiririoka izy ireo.
Isaorana ny filohampirenena Andry Rajoelina, fa tao anatin’ny fisainana sy fahendrena ny nananganana ny governemanta vaovao, hoy atoa Rakotomalala Henri na Riribe, filoha nasionaly ny gadra politika. Nambarany, fa mitaky vokatra tsara avy amin’ireo minisitra tsirairay ny filohampirenena. Ka anisan’izany ny fijerena ny vidin’ny jiro an’ny jirama, ny vary, ny menaka, ny PPN amin’ny ankapobeny.
Niditra tamin’ny fanovana ireo mpikambana eo anivon’ny governemanta ny Filohampirenena Andry Rajoelina. Nitondra ny heviny mikasika izany ny Ben’ny tanànan’Ambohitrimanjaka, atoa Randriamanalintsoa Ihajason na Zàzà.
Andriamanampy André Théodule no anarana fenon’ity mpanakanto Zanak’i Mampikony ity. Ao anatin’ny taom-pisandratana ny tovolahy ankehitriny ary manaraka ny sampam-pianarana lalàna. Ny « Lewapy » izay solonarana efa nentiny tamin’ny fahazaza no nofinidiny nisalorana hamakivakiana ny lalan-tsarotry ny mozika.
Nahazo fanampiana avy tamin’ny « Association Entraide Vendée Itasy » lambam-pandriana, servieta, housse ireo zaza kambotin’ny zandary ao Arivonimamo. Nambaran’ny kapiteny Randriamanjato Lucien izay mitaiza ireto kamboty ireto, fa zava-dehibe ho azy ireo no nahazoana izao fitafiana sy drap ary kojakoja samihafa izao ary nankasitraka ny fikambanana izay nanolotra izany fanampiana izany ity manamboninahitra ity.
Efa miroso tanteraka amin’ny fanisana ny trano sy ny toeram- ponenana ny kaominina Antananarivo Renivohitra, ka ny boriborintany fahatelo miaraka amin’ny delege sy ny mpiasa no manatanteraka an’izany, raha ho an’ny boriborintany fahatelo manokana.
Ho mariky ny fitiava-tanindrazana sy ny fihavanana ary ny firaisan-kina dia nanao fanambarana iombonana ny VAM na ny Vondron’ny Ambany tanàna Miray. Lavin’izy ireo marin-drano ny hisian’ny tetezamita intsony eto amin’ny tany sy ny firenena ary tsy mankasitraka ny fanonganam-panjakana eto Madagasikara intsony ity fikambanana ity.
Mila apetraka amin’ny toerana mendrika sy sahaza azy ny hira evenjelika mba tsy ho kitoatoa sy hanaraka ny fenitry ny kanto ny fomba hanehoana sy hanolorana azy ho an’Andriamanitra sy ireo mpankafy. Ho fanatanterahana izany no nanainga an’i Rochel Randrianoelina nanangana ny Groupe « Taf ‘ Yray ».