Nandresy ny ekipan’i Mali tamin’ny isa 1 no 0 ny Ivoriana omaly. Nisaraka ady sahala 1 noho ny 1 kosa i Ghana sy Tonizia, ka niroso tamin’ny « tir au but » ny roa tonta. Nivoaka ho mpandresy tamin’izany i Tonizia (5 noho 4).
Valo, araka izany, ny ekipa tafakatra, dia i Sénégal, Bénin, Afrika Atsimo, Nizeria, Alzeria, Côte d’Ivoire, Tonizia ary Madagasikara.
Ny alarobia ho avy izao noho izany no hitohy ny lalao, ka hifandona amin’izany i Sénégal sy Bénin, Nizeria hihaona amin’i Afrika Atsimo. Ny alakamisy kosa no hifanandrina i Côte d’Ivoire sy Alzeria ary i Madagasikara hifampitady amin’i Tonizia.
Hitohy ny fanohanana
Araka ny fantatra dia hisy ny fandaminana, araka ny tenin’ny Filoham-pirenena, ny amin’ny fanohanana ny Barea, ekim-pirenena malagasy, amin’izao hiakarany amin’ny ampahefa-dàlan’ny lalaon’ny CAN 2019. Heverina hisy hatrany, noho izany ny fiaramanidina , hitondra teratany malagasy ho any Ejypta, hijery sy hanohana mivantana izao ezaka lehibe vitan’ny ekipa malagasy izao.
Hipetraka ho tantara lehibe eo amin’ny sehatry ny baolina kitra maneran-tany izao fiakaran’ny ekipa malagasy amin’ny dingana ambony izao. Hany ka rariny loatra ny hisian’ny fanohanana azy amin’ny fomba rehetra. Anisan’izany ny fitondran’ny fiangonana sy ny mpino ao aminy am-bavaka ireny lalao ireny, toy izay nisy tetsy amin’ny Fiangonana FJKM Ankazomanga. Fiangonana izay mitaiza an’i Lalaina Nomenjanahary na i Bolida rahateo ka nanao fotoam-pivavahana ho azy sy ny Barea manokana ary nandrindra ny fijerena baolina tao an-trano fiangonana, ny alahady lasa teo.
Pour mieux vous servir, l’AMP travaillera dans le respect de tout un chacun, dans la réalité des actualités et de ce qui nous entoure. L’objectivité sera notre mot d’ordre.
